Afbeelding
De Vastelaovendj Noetsbreef | 14 december 2018
…………………………………………………………….
Afbeelding
Di-j vröllie

Wi-j smêrges vreug nao d'n ieërsten huweliksnacht
zien vraw 'm de gezét én 'n moeër boeëve bracht,
en hae vraogendj nao di-j flînke moeër hieën wieës,
hieël vörzichtig, want hae meindje: Oei, 't és al niês,
zag ze verwîetendj, mer toch ouch 'vraw-eîge-fien':
"Ich wil ouch waal 's zeen of dejje aetj wi-j 'ne kniên!"




| Knipuigske van Frans Adriaens |
 
…………………………………………………………….

Kaartverkoup Kuit op Zuid

Atténsie Atténsie, de vuuërverkaup van Kuit op Zuid 2019 és now aankaomendje zoondig 16 desêmber. De polsbêndjes-verkaup és in de Microbar aan de Nassaulaan. De vreuge vuuëgel vuuërverkaup begintj um 11.00 oor en deurtj tot 13.00 oor.

Zeen neet alle polsbêndjes verkochtj dan ki-jjae nao de 18e nog polsbêndjes kriege beej de Jumbo op Moesel.

Letj op! 2 polsbêndjes de man!

P.S. Kuit op Zuid 2019 és op 16 fibberwari 2019! Wis dan!
…………………………………………………………….
Afbeelding
…………………………………………………………….
Afbeelding
Dieës waek stelle vae de pittige vraog aan Maurice Houben, aod Preens beej de Rogstaekers, Jênser en vastelaovendjveerder in hert en nere.
 

'De vastelaovendj, és dae op z'n retour en zoeë jao,
waat kinne vae dao aan verângere'?

Es de vastelaovendj op z’n retour zoeë wil ich ’t neet zegge, mér gae motj er vandaag de daag waal wat mieër vör doon um ’t tot ’n sukses te maake.

Waat evenementen betreftj in mien Wieërt, sommige, zoeë as ’t Boorebal, Vastelaovendj Zaoterdig en Diensdig zeen ’n bitje ingeslaope, met tot gevolg det er minder minse oppe bein zeen met deej daag, of nao ’n anger stad trekke um beveurbieëldj de Zoepkoel of Sjtasiefestasie te bezeuke.
Mér good, evenementen weej ’t Boorebal  dao waertj aan gewerktj, now deej anger daag noch ‘ne gooije impuls gaeve en vae zeen weer oppe gooie wegk.Want zegk now ieërlik, weej schoeën waas Harry op zaoterdigaovendj met 1200 man inne tent ’n paar jaor gelie-je!

En ouch de Groeëte Optocht hieët ’n bitje aan kwaliteit verloeëre, op de Jênsers nao umdet de Braobendjers met eure groeëte wages wegk blieëve.
Oplossing: zeuktj ‘ne sponsor(s) en verhoeëgtj ’t prieëzegeldj van de ieërste 3 groeëte wages, of de Gouwe Rog winnaar kriegtj €1000,- boeëveop de vergeujing, mojje es kieëke weej gaw ze trök zeen…

En det geldtj ouch vör ôngerneemers, de tîed dejjae de duuër oeëpe kosj zette en de tent zoot vol es vörbeej! Gae motj ôngerneeme, en det wiltj zegge oppe tîed ‘nne artiest, ’n evenement, uch laote zeen op Social Media etc. Gae motj de minse wat te beeje hebbe, want beer kinne ze op eedere hook kriege. En d’r zeen d’r beej deej snappe ‘t, en laotj now net deej zaake vol zit met deej daag!
Mér d’r zeen d’r ouch deej haaje 5 jaor geleeje eur zaak vol zitte, en meine met daezelfdje formule jaor in jaor uut volk te trekke, en deej snappe ’t dus neet, met tot gevolg det dao neeme mieër keumtj…

En as letste de jeugd, nateurlik de jeugd hieët de toekomst.
Mér um de jeugd met te krieëge mojje in eeder geval met de tîed van hun meij gaon.
Op Bosseve dao begriepe ze ‘t, dao haaje ze veurig jaor een Vlog-party en det es wat de jeugd triggertj.
Hejjae ‘ne hosmiddig, streamtj dae op Facebook of Youtube, en zörrigtj vör artiesten deej hun op dit moment ruig vinge, tösse de Vastelaovendj meziek doeër moog gerösj ‘ne rapper zitte…

 
En kaltj plat tieëge eur wichter, Nederlands lieëre ze op schoeël…Anges kijjae noeëts geine Preens waere mojje zegge
!
Afbeelding
…………………………………………………………….

Koppe Bawwe

Jao joonges en maegtjes,

Gae kintj waer mejdoon mét 't Koppe Bawwe en daomej prebieëre de Kleine Gouwe Rog te winne in de groeëte Wichteroptocht, dae op maondjig 4 mieërt 2019 doeër de binnestad van Wieërt trektj. Kotj met eur pap of mam gezellig bawwe in oeës hal aane Stekshofwieëg.

Vanaaf dit jaor doon vae det oppe zaoterdigge 12, 19 en 26 jannewarie en 2 fibberwarie van 9 wis 12 oor. As dejje op sporte zitj, ésj dan toch wîntjerstop, dus waat letj uch um neet mej te doon.Laotj eur pap of eur mam dan waal effe zoeë snel muuëgelik 't formeleer invölle op de speciaal pagina oeëver 't Koppe Bawwe, want 't aantal wichter, waat mej kân doon, és bepêrktj en vôl és vôl!

Mieër info op:
https://www.vvderogstaekers.nl/2018/12/koppe-bawwe-2-0/
…………………………………………………………….

Kaartverkoup Faliekant Plezant 2019

Zetj zoondig 10 fibberwari mer vast in eure agenda want dan és de veerdje editie van Faliekant Plezant. De organisatie hieët ouch dit jaor weer vör 'n flînk aantal schoeën artieste gezörgdj. De kaartverkoup begintj op zaoterdig 8 december a.s. Kaarte zeen o.a. te koup beej kapsalon Wigbert aanne Maasport en beej kefee De Tramhalt. 
Afbeelding
…………………………………………………………….

Inschriêve De Vastelaovendj Pubkwis | 11-1-2019

Op vriêdig 11 jannewari 2019 organisieërtj Vastelaovendjvereiniging De Jênsers de Vastelaovendj Pubkwis. Vanaaf 20.11 oore gaon maximaal 33 teams van 3 tot 5 persoeëne de striêd met mekaar aan in kefee De Tramhalt. De 7 x 11 vraoge zölle allemaol vastelaovendj gerillatieërdj zeên. Wejjae alles oeëver de vastelaovendj van Wieërt en de Boeteni-je, stel dan ’n team van 3 tot 5 persoeëne same en schrieftj uch vör ’t bedraag van € 11,- in aanne bar vanne Tram. In de priêzepot zitj ‘ne ieërste priês van € 111,- ‘ne twieëdje priês van € 66,- en ‘ne dêrdje priês van € 33,-. Vèrder zal d’r inne pauze e rondje pauzekiene met schoeën prieëskes, plaats vînge. Letj op, d’r és mer plaats vör 33 teams, dus zörgtj dejje d’r oppe tiêd beej zeetj.

Gae kintj uch nog inschriêve aanne tap beej kefee De Tramhalt

Volgtj de facebookpagina vanne vastelaovendj pubkwis!
www.facebook.com/vastelaovendjpubkwis
…………………………………………………………….
Afbeelding
Vör mer € 15,00 incl. CD
…………………………………………………………….
Afbeelding
15-12-2018
Cenosillicafobie Beejeinkomst

20.00 oore tot 04.00 oore
kefee Vreug of Laat


11-1-2019
De Vastelaovendj Pubkwis

kefee De Tramhalt

10-2-2019
Faliekant Plezant
vanaaf 10.00 oore
kefee De Tramhalt
…………………………………………………………….
Afbeelding
Hejje iets te koup op vastelaovendjgebied, zeukdje 'n pekske,
of mojje 'ne komplieëte vastelaovendjwage kwiêt.
Gaeftj 't doeër en vae plaatse 't in't prikbord!
Steurtj eur bericht nao
info@dapro.nl
…………………………………………………………….
Hejje iets te mèlde,
hejje ideë of zeejje kwaod… 
Hejje noets, 'n vastelaovendjfeëst of waat ângers,
gae kintj eur ei kwiêt op info@dapro.nl
…………………………………………………………….