In aanluîp nao de veurrondes van het Limburgs Buutte Kampioenschap vîngtj d’r op vriêdig 2 november ‘ne buutte try-out plaats beej kefee/zaal De Hook in Wieërt.

Acht Limburgse buuttereedners prizzentieëre dieëze aovendj hun nowwe buut dae nog neet ieërder in ‘n veurronde of finale te huuëre és gewaesj.
Initiatiefneemer vör dieëze aovendj és buuttereedner Rob Princen. ‘’Mien idee waas um met ‘n aantal buuttereedners di-j nog neet hieël völ jaor actief zeen in dit buutte werreldje, um beej mekaar in de woeënplaats try-outs te gaon organizieëre. Zoeë kinne vae as buuttereedners hieël völ oefenen, en kinne vae os ouch veurberrejje op de veurrondes di-j d’r in november aan zitte te kaome. Heej vör heb ich de samenwêrking gezochtj met Tom Reemers van kefee/zaal De Hook dae dit ‘n schoeën initiatief vong en gaer ziene zaal ter beschikking wooj stelle vör dieëze aovendj’’.

‘’De deilneemers zeen verdaeldj oeëver hieël Limburg. En ich heb zellufs twieë collega’s uut Bêls bereidj gevônge um hun buut heej te kaome prizzentieëre’’ De deilneemendje buuttereedners vör dieëze aovendj zeen: Kevin Evers (Haler), Hub Gijsen (Maasmechelen), Charlie Wijen (Wieërt), Nils Naus (Neeritter), Suzan Janssen (Swalmen), Patrick de Groof (Maasmechelen), Roland Broers (Valkenburg) en Rob Princen (Wieërt).

De zaal és oeëpe vanaaf 19.15 oore. Het programma startj um 19.45 oore en de entree és gratis.

’t És 20 oktoeëber inne middig as ich aan taofel zit met Ronald Moeëne van Studio Difference en neteurlik Duo Difference. Vae gaon ’t hebbe oeëver ’t WVLF, ’t Wieërter Vastelaovendj Lidjes Festival.
Det ’t lidjesfestival de leste jaore ingekâktj és en det de gloriedage van festival vörbeej zeên, dao zeen vae ’t al gaw oeëver eins. Woeë d’r vreuger ‘ne bomvolle Poort nao alle lidjes kwoom loestere en woeë det d’r nog ’n schoeën cd gemaaktj werd és det noow waal ângers, mer neêt langk mieër.
Nao det ’t lidjesfestival altiêd in hang és gewaesj vanne Rogstaekers hebbe zeuj ’t dit jaor oeëvergedrage aan o.a. Ronald Moeëne, Phil Aspers en Jean Pierre Knapen. Met ’n stichting in wording gaon ze ’t lidjesfestival now laeve inblaoze. De Rogstaekers kiêke dit jaor nog mej, mer vanaaf volgendj jaor motte ze eur eige buuenkes gaon doppe. Artieste hebbe zich in kinne schriêve en daonao zeên artiest en schriêver samegebrachtj, as det noeëdig waas neteurlik. In totaal gaon d’r op ’t WVLF tieën lidjes de revue passieëre met volges Ronald, behuuërlik waat variatie en vlotte nummers, “gein wêlskes en polkaas mieër”. Op mien vraog of d’r ’n cd keumtj és ’t ântwoeërd “nein”. ’t Winnendje lidje kân straks gedownloadj waere of és te beloestere op de bekindje kanale as Spotify.
Groeët pluspeunt (volges mich dan) és ’t samebrînge van alle vastelaovendjvereiniginge en vastelaovendjveerders oet de stad en boêteni-je zoeëdet ’t winnendje lidje ouch ’n lidje van hieël Wieërt weurtj. Zoeë zal d’r ouch ’ne jurygroep van alle vorste van Wieërt en de boêteni-je zeên en és ’t winnendje lidje gegarandieërdj van diverse optrei-jes in Wieërt en de boêteni-je. Mer weej zitj det dan met deej jury. D’r zal ’n vakjury zeên van boête Wieërt (onaafhânkelik dus), d’r zal de vorstejury zeên en d’r zal e peblieksjury zeên. Peblieksjury… mer det bin ich huuer ich uch zegke. Det kloptj, ’t WVLF zal live waere uutgezonde op facebook. Gae (de peblieksjury) kintj eur stum uutbreenge via ‘ne app. Mieër info és te vînge op www.wvlf.nl.
Vör mien geveûl és dit ‘ne belangrieëke stap vör de Wieërter vastelaovendj. Want zegktj noow zelf, waat és ’n vastelaovendjstad as Wieërt zónger lidjesfestival….

Zörgtj dejje d’r beej zeetj, beej de Hoêskamer, of achter eure computer…..
Zoondig 4 november vanaaf 15.00 oore, ’t WVLF!