De Vastelaovendj Noetsbreef | 30 november 2018 |
|
|
Gelök hebbe
In e klein broên kefeeke aanne stadterbrök
haaj Twan mét kaarte altiêd ontieglik gelök.
Mer gokke in Schaesberg op rennendje paerd,
dao woor hae, verwoongerlik, hieël niks in waerd.
Wi-j me vroog: “Twan, wi-j kân det noow?”,
knieëp hae naodînkendj ’n uigske hâlf tow
en zag: “det és toch hieël eenvoudig mân,
umdet ich paerd einmaol neet schöddele kân.”
| Knipuigske van Frans Adriaens |
|
|
|
Weem és Nick van Ham........
Ich zit aan taofel met de körsvörse winnaar van ’t Wieërter Vastelaovendj Lidjes Festival, Nick van Ham. Mer weem és Nick van Ham eigelik…….
Nick van Ham, geboeëre op 24 december 1967 és zieëker gein onbekindje inne Wieërter vastelaovendj. Beej De Rakkers, ‘ne optochtgroep van naeve, nichte, en vrîndje és ‘m de vastelaovendj met de paplieëpel ingegoote. Mer d’n drang um as einling d’n optocht te loupe trektj Nick mieër as ’t loupe met ‘ne groep. In ’82 luiptj Nick vör ’t ieërst as einling inne wichteroptocht en e jaor later in ’83 és ziene veurduip, as V.V. De Einling, inne groeëte optocht van Wieërt. Tot op hede hieët hae d’n optocht nog eder jaor geloupe. ‘’Ich bin waal dekker gevraogdj um beej de ein of ânger vereiniging te kaome, mer as einling veul ich mich ’t mieëst op m’n gemaak’’, aldus Nick. Weem herinnertj zich neet ‘De Maelige Vênt’, ‘Ich kloon hieël Wieërt’ of ‘Miene beste buut’. De interactie met ’t vôlk en ze laote lache, dao deute ’t vör. Inspiratie haaltj Nick oeëveral um zich haer vanaaf. Vanne tillevies, oppe straot en inne kroeg. En as hae dan ’n idee hieët gieët hae ’t ieërst teste beej z’n zus, e ieërlikker oeërdael kijje neet kriege.
Zoeë waas d’r ouch ’s e jaor of 20 geleeje ‘ne droûm um e vastelaovendjlidje te schriêve en te zînge. En 4 november j.l. kwoom dae droûm uut. 20 jaor Nick, és det neet wat langk? “Zoeë aaf en tow schreef ich e stökske en dan gongtj weer de kast in. Aaf en tow e klein stökske en dan oeëts e paar jaor niks. De gelaegenheid deej zich dan neet vuuër of d’r waas altiêd waal wat ângers. Mer noow waas ’t memênt gewoeën dao”. Nick és met de tekst en melodie langs gewaesj beej Mark Fonteyn. Nick hieët de wiês vuuërgezonge en Mark hieët d’r uuteindelik e arrangemêntje van gemaaktj. ’t Hieël lidje keumtj dus uut Nick ziene kop. ’t Lidje begintj op ’n smartlap echtige meneer en knaltj d’r dan e vlot melodieke in. In ieërste instantie gieët ’t op 4 november neet zoeë lekker, de zieënewe doon Nick ziene tekst vergaete, mer laotj os ieërlik zeen, det hieët ouch waal wat. Nick hieët ‘ne hoeëge gunfactor woeë det hae van profetieërtj. As alle lidjes twieë kieër de revue zeen gepassieërdj és ’t tiêd vör ’t stumme en d’n uutslaag. “Zieënewe haaj ich zieëker, mer weej ich as winnaar van’t now vastelaovendjlidje bekindj gemaaktj woort, heb ich effekes ‘ne kieër nao boeëve gekeke. Ich weit zieëker det os pap en os mam ouch gruuëts mej hebbe gekeke”.
Nick kriegtj ’t drök de kaomendje tiêd. Optrei-jes op diverse podia, Wieërt Alaaif, Op deensdig oppe mêrrentj en zelfs op schoeële. Hae staptj gaer met uch in zien Vleegmesjien. Mer weej drök dette ’t ouch hieët “dae optocht op zoondig inne stad en op dieënzig beej de Brökwagters dae loup ich”. Vae zeen Nick gelökkig dus ouch nog gewoeën trök as V.V. De Einling Wieërt.
Patrick Smieëts | De Vastelaovendj Noetsbreef
|
|
Dieës waek stelle vae de pittige vraog aan Wigbert Coppen. Vastelaovendjveerder, lid van Duo Gepaerskuuëteldj en kapper oppe Maasport. És de vastelaovundj op z'n retour ? Volgus mich verângertj alles in de loop d'r jaore toch wul. Zoeë veere vae tieëgewoeërdig waarschieënlûk hieël ângers vastelaovundj dan vreuger, in de jaore 20/30 van de vuuërige ieëuw dus zoeë un 100 jaore gelieëje, kaldje en dieëje de minse ouch ângers dan noow , "taal laeftj " zegge de gelieërdje en zoeë "laeftj" ouch ut vastelaovundj veere dus vastelaovundj verângertj waal met de jaore .mer of de vastelaovundj op z'n retour és , wi-j motte vae det toetse? Minder minse opper straot? Minder minse inne kefee? Minder optochtdeilnemers? En bazieëre van det dan op cijfers of op geveul? Vör mich és vastelaovundj zoeë wi-j zoeë un of alleîn mer geveul , of det ut noow völ minse veere of minder minse ut veere , ut gieët d'r um wi-j dejae ut veertj .Zoeë as b.v. mien pap en mien mam vreuger di-j veerdje de vastelaovundj alleîn mer met boorebâl met weînig alcohol mer waal vanuut eur tieëne met ut sjuuëste vastelaovundj geveul. En det vastelaovundj geveul det verângertj volgus mich neet zoeë völ , jao unne eenkeling zal deenke det ut alleîn um drânk drejtj en unne eenkeling messchien nog um ut geluif (waarschieënlûk neemus) mer wi-j dejae ut ouch veertj en met wi-j völ dejae ut veertj det deut d'r neet zoeë hieël völ tôw , ut drejtj um ut vastelaovundj geveul !!! As eemus deenktj det de vastelaovundj op z'n retour és en dao wat aan mentj te doon , deenk ich det d'r al hieël völ aan gedaon weurtj, zoeë as jong preense keeëze in un vereiniging ( hoewel dit vreuger ouch al dek gebuuërdje) ich zeen ouch al hieël völ jong enthousiaste optocht deilneemers , d'r weurtj hieël völ georganizieértj doeër kefee's en vereiniginge en evenemênte oppe straot . Dus ut zitj wul good met oeëze vastelaovundj in Limburg en in oeës Wieërt. Dus as dejae geboeëre zeetj met ut sjuuëste vastelaovundj geveul zuldjae ut ouch uut en oeëver kinne draage aan eur wichter of naefkes of nichtjes of eur buuëre of weem dan ouch , as dae mer oeëpe stieët um wat van unne verstendjige vastelaovundj veerder aan te neeme !!! |
|
|
Kaartverkoup Vastelaovendj Pubkwis
Op vriêdig 11 jannewari 2019 organisieërtj Vastelaovendjvereiniging De Jênsers de Vastelaovendj Pubkwis. Vanaaf 20.11 oore gaon maximaal 33 teams van 3 tot 5 persoeëne de striêd met mekaar aan in kefee De Tramhalt. De 7 x 11 vraoge zölle allemaol vastelaovendj gerillatieërdj zeên. Wejjae alles oeëver de vastelaovendj van Wieërt en de Boeteni-je, stel dan ’n team van 3 tot 5 persoeëne same en schrieftj uch vör ’t bedraag van € 11,- in aanne bar vanne Tram. In de priêzepot zitj ‘ne ieërste priês van € 111,- ‘ne twieëdje priês van € 66,- en ‘ne dêrdje priês van € 33,-. Vèrder zal d’r inne pauze e rondje pauzekiene met schoeën prieëskes, plaats vînge. Letj op, d’r és mer plaats vör 33 teams, dus zörgtj dejje d’r oppe tiêd beej zeetj.De kaartverkoup startj op zaoterdig 1 december van 11.30 oore tot 13.30 oore beej kefee De Tramhalt. De oeëvergebleve kaarte zeen daonao verkrieëgbaar aanne bar beej De Tramhalt.Volgtj de facebookpagina vanne vastelaovendj pubkwis!
www.facebook.com/vastelaovendjpubkwis
|
|
7 en 8-12-2019
De Buut in 't Groenewoud
www.schaopkes.nl11-1-2019
De Vastelaovendj Pubkwiskefee De Tramhalt10-2-2019Faliekant Plezantvanaaf 10.00 oore
kefee De Tramhalt |
|
Te Koup
e kaertje vör de vriêdig vanne Buut op Groenewoud vör de helft vanne priês.
Det és dus € 6,-
FF appe met 0630794200
_____________________________________ |
|
Hejje iets te koup op vastelaovendjgebied, zeukdje 'n pekske,
of mojje 'ne komplieëte vastelaovendjwage kwiêt.
Gaeftj 't doeër en vae plaatse 't in't prikbord!
Steurtj eur bericht nao info@dapro.nl |
|
Hejje iets te mèlde,
hejje ideë of zeejje kwaod…
Hejje noets, 'n vastelaovendjfeëst of waat ângers,
gae kintj eur ei kwiêt op info@dapro.nl |
|
|
|
