'De vastelaovendj, és dae op z'n retour en zoeë jao,
waat kinne vae dao aan verângere'?
Dieës waek stelle vae de pittige vraog aan Mark Bouwmans, tekstschriêver, lidjesmaker, vastelaovendjveerder en Wiepke.De publieke belangstelling vör ’t aojerwetse Vastelaovendjfieëst és in umvang t.o.v. de jaore ‘80/ ’90 vanne vuuërige ieëw aafgenoeëme. Beej traditionele aktiviteite wi-j Boonte Aovendje ’t boorebâl, de optocht (daelnemers) zeejje ‘nne trökloûp. Dét zal z’nne oeërzaak zieëker ouch vînge in ’t feit dét d’r almér mieër te doon és en minse kuuëzes make. Deenktj aan de oktoeëber fieëste (eigelik ouch ‘ne vorm van Vastelaovendj veere), mér ouch de kuuës um i.p.v. Vastealovendj te veere te keeze vör ’n ski verkânsie op verkânsie in de zon. In dét leecht bezeen kujje dus zegke dét de Vastelaovendj “op z’nne retour és”. Al klînktj dét waal êrg negatief.
Gae zeetj namelik ouch ’n verschuuëving in de meneer van Vastelaovendj veere. De opkomst van “mega” Vastelaovendj evenemênte wi-j de 11e in Mestreecht, ’t LVK, de Zoepkoel en Stasie Festasie laote zeen dét Vastelaovendj mieër ’n evenemênte fieëst aan ’t waere és det ouch boete de eige regio weurtj geveerdj. Mer ’t weurtj dus nog waal geveerdj!!
In eur vraog zitj de suggestie dét vae wat motte verângere. Volges mich és de meneer wi-j vae in de towkomst Vastelaovendj “motte” veere ’t antwoeërd op de vraog aan amezemênt vanuut de minse. De vraog zooj ’t aanbod motte bepaole. M.a.w. gae motj dus good nao de (potentiële) Vastelaovendj veerders loestere. ’t Aanbod aan fieëstjes és in dieëze tiêd zoeë groeët dejje minse neet mieër vör de tillevies haaltj met “middelmaot”. M.a.w. dét waajje organizieërtj mot oongerscheidendj zeen. Mer jeh, wi-j doojje dét? Dao braeke de organizieërendje vereiniginge in Wieërt zich volges mich ouch de kop oeëver en ’t és aan de kreativiteit van dieës dames en hieëre um dk-j vraog van ’n antwoeërd te vörzeen. Messchien ésj ’n idee um ze ’n bitje te hêlpe. Laotj de laezers met suggesties kaome en daeltj di-j met de Vastelaovendjvereiniginge. Vör ’t zelfdje gêldj zitj dao ‘n “gouwe eike”beej.
Al es de meneer van Vastelaovendj veere doeër de jaore haer verângerdj, âl met âl liektj ’t mich dét d’r nog best meziek in zitj. Laotj ‘t os ’t kaomendj jaor mer gewoeën weer ’s prebieëre J.
Met vrîntelikke Vastelaovendjgroete,