Dieës waek stelle vae de pittige vraog aan Rosan Camp. Vastelaovendjveerder, aod boonte aovendj artiest en optochtgek same met Irene.
“De Vastelaovendj, es dae op z’n retour, en zoeë jao, waat kinne vae dao aan verangere?”
Jeh nein! Vastelaovendj es neet op z’n retour! Toch?
Vastelaovendj, det es ’t schoeënste fieëst waat d’r es!
Vastelaovendj deurtj beej mich 365 daag per jaor, ich kan d’r gein genogt van krieëge. Sketches schrieëve vör de Boonte femiëliemiddig, pekskes make, optochtmotto vör V.V. Vae kunne op Camp verzinne en bawwe. Vanaaf de 11e van de 11e gaon ich pas echt “los”, eeder fieëstje woeë ze mich verkledj binne laote, dao gaon ich haer. De “groeëte” fieëste doeër hieël Limburg en de fieëstjes doeër hieël Wieërt. Mer zoeë zal neet eederein Vastelaovendj veere, deenk ich.
D’r es vanalles te doon, kijjae dao allemaol haer? Qua tiêd? Vae hebbe ’t allemaol drök…? Qua cente ? gae kintj dae euro mer eine kieër uutgaeve? Ut es volges mich ’n gooij zaak det d’r völ variasie gebooije wurtj, zoeëvöl mînse zoeëvöl weense. Mer det zörgtj d’r waal vör det ’t neet oeëveral “aafgelaaije vôl” zal zeen, ’t eine evenement zal kome, en ’n anger wieër gaon!
Dek huuër ich det vae nog mer met te weinig Vastelaovendjveerders oeëver zeen.
Zeen vae Vastelaovendjveerders ’n uutstervendj ras?
Det geluif ich neet!
Woeërum veer ich Vastelaovendj? Umdet ich det keij sjiek ving, mer ouch umdet ich neet angers gewintj bin, ich bin zoeë opgeveutj, doeër m’n aoijers, beej de V.V. de Krubbebieëters. Ich leep inne boeëk van mien mam al d’n optocht en dao bin ich noeëts mej gestoptj! Gestimulieërtj op basisschoeël de Beest doeër Huub vanne Bosch, zaliger, um mej te doon met de Wichter Boontemiddig en ouch daomej noeëts gestoptj.
De wichter, de jeugd, hieët de sluuëtel in hang!
Ich ving det echt prachtig di-j jong vereiniginge di-j d’n optocht loupe, maegdjes en joonges di-j same in ‘n kaoij loeëdse tiêd make, um onger mekaar ‘nne wage te bawwe! Groeëte en klein, schoeën en minder schoeën….mer aldoondje lieërendj. En wi-j prachtig es ‘t dan, as dejjae ze met de jaore, zeetj grui-je en misschiens waal met de prieëze zeetj gaon loupe in dae’n optocht.
Vae zooije oeës wichter, kleinkeendjer, naefkes, nichtjes of lieërlinge motte stimulieëre um Vastelaovendjveerder te waere. Dit um vör de tôwkomst de Vastelaovendj in stand te kinne haoije.
Ieërlik es ieërlik, ich heb 2 prachtige zuuëns, woeëvan de jongste inne jeugdraod zoot, preens waas van zieën schoeël en now de optocht luiptj met V.V. De Fluitendje Kuiters (2017). Mer mieëne aodste zoeën, dae guftj nog minder as niks um. Vastelaovend! Nao de groeëte Rogstaekers optocht kieëke, neet verkledj, en allein beej zonnig waer, es alles woeëtow ich ‘m kan verlei-je. Zooij det nog goot kome? Woeë es det fout gegange? Och wat, ich haoij aevezieër van ‘m! Ut es ’t bewieës det vae allemaol angers zeen en Vastelaovendj op ’n anger meneer veere. Sommige veere ’t uutbundig en sommige ingetooge en laotj de rest mer gaon skieëije.
